Showing posts with label տարեդարձ. Show all posts
Showing posts with label տարեդարձ. Show all posts

30/06/2020

Այսօր Արմեն Հովհաննիսյանը կդառնար 26 տարեկան

  Հերոս չեն ծնվում, այլ դառնում են, որովհետև կյանքով լցված երիտասարդը դժվար թե պատկերացներ, որ մի ակնթարթում՝ առանց մտածելու, կշեռքի նժարին կարող է դնել ամենաթանկը՝ հենց կյանքը...
Հունիսի 30-ը Արմեն Հովհաննիսյանի ծննդյան օրն է: Ամեն տարի՝ փոփոխվող թվերի հետ, ցավն ավելի ու ավելի է մեծանում, որովհետև նրան շնորհավորելու, գրկելու փոխարեն մենք դեմ ենք առնում նրա գերեզմանաքարին:

Քայլերս էլի տանում են Եռաբլուր, մի վայր, որտեղ ակամայից ժպտում եմ ու խաղաղվում: 
Ոտքերիս տակ հողը տաք է, երբեմն նույնիսկ ոչինչ չեմ զգում: 
2014թ.-ին Արմենն իր մարմնով փակեց փամփուշտի ճամփան, բայց պատերազմի դուռը մինչ օրս կիսաբաց է մնացել...
Այսօր ես նայում եմ երկնքին ու հասկանում, որ տղաները մեր հաղթանակն են, քանզի նրանք խլացնում են իրենց գլխավերևով անցնող փամփուշտների ձայները, որ մեր գլխավերևում թռչունները խաղաղության երգեր երգեն։

Ծնունդդ շնորհավո՜ր, եղբայր, թող հոգիդ սավառնի լույսերի մեջ, փառք ու պատիվ քեզ...

Ստորև Banak.info-ն ներկայացնում է ֆոտոշարք՝ Եռաբլուր զինվորական պանթեոնից:
              

         Իննա Թումանյան


















Ծանուցում․ Կայքից մեջբերումներ անելիս հղումը www.banak.info-ին պարտադիր է: Կայքի հոդվածների մասնակի կամ ամբողջական հեռուստառադիոընթերցում առանց www.banak.info-ին հղման արգելվում է: 
Տեղեկացրու՛ ընկերներիդ`

21/04/2020

Գիտեմ, որ Երևան այլևս չեմ գա, ինձ կբերեն. Թաթուլ Կրպեյանը կդառնար 55 տարեկան


Ինչո՞ւ եք վախենում մահից։ Հողի համար ես հենց հիմա պատրաստ եմ մեռնելու. հողի, ազգի համար։ Ես ոչ մի անգամ չեմ գնա Երևանի օդանավակայանում իջնեմ, ասեմ՝ Գետաշենը հանձնեցի։ Ես այստեղ կմեռնեմ, այդ բանը չեմ անի...

Այս խոսքերը թույլ են տալիս ամբողջությամբ պատկերացում կազմել Արցախյան պատերազմի մասնակից, ՀՀ Ազգային հերոս, հայրենիքի նվիրյալ զավակ Թաթուլ Կրպեյանի մասին, որը  ծնվել է 1965թ.-ի ապրիլի 21-ին՝ Թալինի շրջանի Արեգ գյուղում: Նա 1984-1985թթ. ծառայել է Խորհրդային բանակում: 1987թ.-ին ընդունվել է Երևանի Պետական Համալսարանի պատմության ֆակուլտետ: 1987թ.-ի աշնանից անդամագրվել է «Միացում» կազմակերպությանը, իսկ 1990թ.-ից՝ ՀՅԴ կուսակցությանը: 
Կրպեյանը եղել է Արցախյան շարժման երիտասարդական թևի սիրված առաջնորդներից, զանգվածային երթերի ու հանրահավաքների, նստացույցերի ու դասադուլների կազմակերպիչներից, և ուսանողության շրջանում՝ քարոզչություն իրականացնող առաջամարտիկներից մեկը: 
1990թ.-ի սեպտեմբերին Թաթուլը մեկնեց Արցախ, որտեղ վիճակը շարունակում էր վատթարանալ։ Իր իսկ հիմնած զինված խմբով՝ 1990թ.-ի սեպտեմբերից մինչև 1991թ.-ի մայիս ամիսը, նա ղեկավարեց Գետաշենի ենթաշրջանի (Գետաշեն-Մարտունաշեն) ինքնապաշտպանությունը՝ ընդդեմ ադրբեջանական զինված ուժերի և ոստիկանական խմբավորումների։ 
 Կրպեյանն այսօր մեզանում դարձել է մեկն այն քաջարի հայորդիներից, որոնց անունները հայոց պատմության դասագրքերում ոսկե տառերով են գրվում: Նա մարտական ընկերների հուշերում մնացել է անգերազանցելի «ուսուցիչ», որից միշտ սովորելու բան կար և որին իրոք անհնար էր գերազանցել:
 Նրա կյանքն անմնացորդ նվիրում էր հայրենիքին՝ քանզի զոհվեց 1991 թ.-ի ապրիլի 30-ին՝ «Օղակ» գործողության ժամանակ։ Մինչ այդ, Թաթուլը հաճախ էր կրկնում, որ. «Գետաշենը կդատարկվի միայն իր դիակի վրայով»…
Վերջին անգամ, երբ գալիս է Երևան, գնալիս ասում է հետևյալը.
-Գիտեմ, որ Երևան այլևս չեմ գա, ինձ կբերեն...
1996 թ.-ի սեպտեմբերի 20-ին նա արժանացել է ՀՀ Ազգային հերոսի կոչմանը։ Պարգևատրվել է նաև «Հայրենիք» շքանշանով։
2015թ.-ի մարտի 18-ին Երևանի ավագանու որոշմամբ՝ մայրաքաղաքի զբոսայգիներից մեկը վերանվանվեց Թաթուլ Կրպեյանի անվամբ: 2015թ.-ի հոկտեմբերին նրա անվամբ անվանակոչվեց Երևանի թիվ 62 ավագ դպրոցը:
Հերոսի անունով են կոչվում նաև ՀՅԴ արտասահմանյան մի քանի կազմակերպություններ, դպրոց` Արեգ գյուղում և Կովսական քաղաքում (ԼՂՀ Քաշաթաղի շրջան), փողոց` Թալինում, լսարան` Երևանի պետական համալսարանի պատմության ֆակուլտետում:
Ազգային հերոսը թաղված է Արեգ գյուղում, որտեղ կանգնեցված է տուֆակերտ հուշակոթող:

                                                                                              
                                                                                                                          Իննա Թումանյան




Ծանուցում․ Կայքից մեջբերումներ անելիս հղումը www.banak.info-ին պարտադիր է: Կայքի հոդվածների մասնակի կամ ամբողջական հեռուստառադիոընթերցում առանց www.banak.info-ին հղման արգելվում է: 
Տեղեկացրու՛ ընկերներիդ`

22/02/2020

Տիգրան Պողոսյանը դարձավ 28 տարեկան /Ֆոտոշարք/


Գյումրի 22.02.2020թվ. Banak.info
Փետրվարի 21-ին հայրենիքի պաշտպանության ժամանակ զոհված Տիգրան Պողոսյանը կդառնար 28 տարեկան։
Շիրակի մարզի Հոռոմ գյուղում ծնված կապուտաչյա Տիգրանը դեռ դպրոցական տարիներից էր որոշել, որ զինվորական է դառնալու, նրա այդ որոշմանը ոչ ոք դեմ չէր եղել։
2010 թվականին Տիգրանն ընդունվել է Վազգեն Սարգսյանի Ռազմական ինստիտուտ, ուսանելու տարիներին մշտապես աչքի ընկել իր նվիրված ծառայությամբ, պարտաճանաչությամբ ու կարգապահությամբ։
2014թվականին ավարտելով համալսարանը ծառայության է անցել Մարտակերտի N զորամասում լեյտենանտի զինվորական կոչմամբ, որպես մոտոհրաձգային վաշտի հրամանատար։
2016 թվականի ապրիլին հակառակորդը ձեռնարկել էր լայնամասշտաբ ռազմական գործողություններ արցախա-ադրբեջանական սահմանի ողջ երկայնքով։
Ապրիլի 25-ի լույս 26-ի գիշերը հակառակորդի հրթիռակոծման հետևանքով Տիգրանը զոհվում է։
Տիգրան Մխիթարի Պողոսյանը հետմահու պարգևատրվել է ՀՀ նախագահի կողմից «Արիություն», ԱՀ նախագահի կողմից «Մարտական ծառայություն» մեդալներով և ավագ լեյտենանտի զինվորական կոչմամբ։

Ինչպես ամենտարի, այս տարի ևս Տիգրանի ծննդյան օրը տեղի ունեցան մի շարք միջոցառումներ։
Երևանի Արշավիր Շավարշյանի թիվ 40 դպրոցի դասասենյակներից մեկում, որը կրում է Արցախյան գոյամարտի հերոս Արկադի Տեր-Թադևոսյանի անունը, բացվեց Տիգրան Պողոսյանին նվիրված Փառքի անկյուն։
Տիգրանի ծնողները այցելեցին Հայրենիքի պաշտպան վերականգնողական կենտրոն, հանդիպեցին հայրենիքի պաշտպանության ժամանակ տարբեր ժամանակներում վիրավորում ստացած զինվորներին։
Օրվա ավարտին տեղի ունեցավ «Մի կտոր հաղթանակ» գրքի շնորհանդեսը, որի հեղինակն է «Վիվարտ» մշակութային հասարակական կազմակերպության նախագահ՝ Վարդուհի Գասպարյանը։ Գրքում զետեղված է Տիգրանի անցած ուղղին, հերոսական կերպարն ու մարդ տեսակը։
Ֆոտոշարքը ստորև։


Դավիթ Թորոսյան, Ալվինա Հարությունյան






























Ծանուցում․ Կայքից մեջբերումներ անելիս հղումը www.banak.info-ին պարտադիր է: Կայքի հոդվածների մասնակի կամ ամբողջական հեռուստառադիոընթերցում առանց www.banak.info-ին հղման արգելվում է: 
Տեղեկացրու՛ ընկերներիդ`

25/11/2019

Մոնթե Մելքոնյանի անվան ռազմամարզական վարժարանում նշվել է հերոսի ծննդյան տարեդարձը


Հայաստանի ազգային հերոս, Արցախի հերոս Մոնթե Մելքոնյանի ծննդյան 62-րդ տարեդարձի կապակցությամբ նոյեմբերի 24-ին հերոսի անունը կրող կրթահամալիրում անցկացվել է հանդիսավոր միջոցառում:
Ավանդույթի համաձայն՝ Մոնթե Մելքոնյանի արձանի մոտ տեղի է ունեցել նաև 2019թ.-ին վարժարան ընդունված սաների խոստման հանդիսավոր արարողությունը։
Միջոցառմանը մասնակցել են պաշտպանական գերատեսչության ղեկավար կազմի ներկայացուցիչներ, «Մոնթե Մելքոնյան ռազմամարզական վարժարան» հիմնադրամի հոգաբարձուների խորհրդի անդամներ, մոնթեականների հարազատները:
Ներկաներին ողջունել է ՀՀ պաշտպանության նախարարի տեղակալ Գաբրիել Բալայանը, ով հորդորել է կրթահամալիրի սաներին բարձր պահել Հայաստանի ազգային հերոս և Արցախի հերոս Մոնթե Մելքոնյանի պատիվն ու արժանի լինել մոնթեականի կոչմանը, մաղթել արդյունավետ ուսումնառություն, անսպառ եռանդ և նպատակասլացություն:

























Ծանուցում․ Կայքից մեջբերումներ անելիս հղումը www.banak.info-ին պարտադիր է: Կայքի հոդվածների մասնակի կամ ամբողջական հեռուստառադիոընթերցում առանց www.banak.info-ին հղման արգելվում է: 

Տեղեկացրու՛ ընկերներիդ`