10/04/2019

Դավիթ Տոնոյանը ոչ միայն ասել է, որ կավելացնենք գրոհային ուժերը, այլեւ արդեն այդ փուլում ենք. Գաբրիել Բալայան

Հայաստանի պաշտպանության նախարար Դավիթ Տոնոյանը ոչ միայն ասել է, որ կավելացնի գրոհային ուժերը,  այլեւ արդեն այդ փուլում ենք, այդ թվում սպառազինության, ռազմական տեխնիկայի առումով: Այս մասին այսօր՝ ապրիլի 9-ին, ԱԺ-ում լրագրողների հետ զրույցում նշեց պաշտպանության փոխնախարար Գաբրիել Բալայանը:
Ինչ վերաբերում է նրան, որ Ադրբեջանը Դավիթ Տոնոյանի այդ հայտարարությունը որակել է որպես ագրեսիա, Գաբրիել Բալայանն ասաց. «Նախարարի հայտարարությունը որպես ագրեսիա ընկալելը անմտություն է: Միգուցե մեր հակառակորդները պարզապես չեն խորանում մեր նախարարի հայտարարության իմաստի մեջ: Կտրտված ձեւով են մեկնաբանում: ՀՀ վարչապետը եւս ասաց, որ կարող ենք նաեւ պարտադրել այդ խաղաղությունը: ՀՀ կառավարության ծրագրում ամեն ինչ հնարավորինս հստակ գրված է»:
Նրա խոսքով, խաղաղությունը որեւէ մեկը նվեր չի տվել Հայաստանին: «Այդ խաղաղությունը, հարաբերական անդորրը պարտադրված է հակառակորդին: Եթե հակառակորդը նորից փորձի սանձազերծել, մենք նորից պարտադրելու ենք խաղաղություն: Իսկ խաղաղություն պարտադրելու միջոցները տարբեր են: Կան եւ ռազմական միջոցներ, եւ դիվանագիտական եւ անձնական շփումների միջոցով»:
Նյութը՝ News.am կայքի։

Ծանուցում․ Կայքից մեջբերումներ անելիս հղումը www.banak.info-ին պարտադիր է: Կայքի հոդվածների մասնակի կամ ամբողջական հեռուստառադիոընթերցում առանց www.banak.info-ին հղման արգելվում է:
 Տեղեկացրու՛ ընկերներիդ`