10/03/2017

Արգիշտի Արծվիի Գաբոյան

Գյումրի 10.03.17 Banak.info
Պարոնայք ապաներ, հոգիները ձեր` հողն ու սահմանն են...
Արգիշտին ծնվել է 1991թվ. Շիրակի Մարզ, գյուղ` Մեծ Մանթաշ: 2008թվ. ավարտելով դպրոցը ընդունվել է Վ.Սարգսյանի անվան Ռազմական ինստիտուտ: Ավարտելուց հետո ծառայութան է անցել ԱՀ` Թալիշում, որպես հրաձգային վաշտի հրամանատար:
Արգիշտին դեռ մանկուց գնահատել է հայրենիքը, քանի որ նա ուներ իր իսկ հայրիկին, որպես օրինակ, Արցախյան պատերազմի տարիներին Արգիշտիի հայրը առաջիններից էր, ով կամավոր մեկնեց Արցախ:
Փոքր տարիքից Արգիշտին միշտ եղել է Արցախում, կապվել է ու սիրել: Պատերազմի ավարտից հետո Արգիշտիի հայրը պայմանագրային զինծառայող է դառնում և պահպանում կերտած անկախությունը:
Արգիշտիին բնութագրում են, որպես ուժեղ մարդու տեսակ, իրական հայրենասեր հայ, չպարտվող, չկոտրվող նպատակասլաց ու խիստ, բայց և յուրահատուկ լավ մարդ:
Նույն զորամասում ծառայող զինվորներից մեկը բնութագրում է Արգիշտիին «Խիստ ու պահանջկոտ հրամանատար, բայց լավ ու գիտակից մարդ, օգնող ու գնահատող ու շատ հայրենասեր»:
Ծառայության ժամանակ բազմաթիվ պատվոգրերի ու շնորհակալագրերի է արժանացել և լավ ու բարեխիղճ ծառայության համար կապիտանի կոչում է ստացել, իսկ ծառայության ընթացքում ԱՀ Նախագահի կողմից պարգևատրվել է «Մարտական ծառայություն» մեդալով:
2016թվ. մայիսի 9-ին Արգիշտին պլանավորել էր զորամասում Վազգեն Սարգսյանի թանգարան բացել, քանի որ շատ էր սիրում Սպարապետին, սակայն ապրիլը կիսատ թողեց շատ ու շատ նպատակներ..
Զինգրքույկում Արգիշտին մի թուղթ է ունեցել, որի վրա առանձնացված գրված են եղել նրա կյանքի պարտադիր կանոնները, որը նա միշտ իր մոտ է պահել և առաջնորդվել դրանցով՝ 
«Մարդ հանդիսանում է իր երկրային ճակատագրի տերը»,
«Ես ինքս պետք է հարթեմ իմ ճանապարհը ինչքան էլ դժվարություններ հանդիպեն կյանքում», 
«Ես կարգատիպն եմ իմ բախտի և ղեկավարն իմ հոգու»:
2016 ապրիլ....
Ապրիլյան պատերազմին հայր ու որդի առաջնագծում էին.
Ապրիլի 2-ին նրանք հանդիպեցին Թալիշում։ Վերջին անգամ գրկախառնվեցին ու Արգիշտին գնաց իրեն առաջադրված մարտական խնդիրը կատարելու ...
Ապրիլի 4-ին սկսվեց ուժեղ հրաձգություն, անհավասար մարտում զոհվեցին Արգիշտիի մարտական ընկերները, նա զինվորներին հրամայեց կրակով պահել իր թիկունքը, որպեսզի նա դուրս բերի զոհված ընկերների մարմինները: Կրակի դադարից հետո, Արգիշտիին էլ ոչ ոք չտեսավ։ Նա գնաց իր մարտական ընկերների մոտ:
Արգիշտի Գաբոյանը հետմահու պարգևատրվել է ՀՀ նախագահի կողմից «Մարտական խաչ» 2-րդ աստիճանի, ԱՀ նախագահի կողմի «Մարտական խաչ» 1-ին աստիճանի շքանշանով և «Արիության համար» մեդալով:
Հերոսի սխրանքին ի պատասխան հարազատ դպրոցում Ռազմագիտության դասասենյակ է բացվել, Վ.Սարգսյանի անվան ռազմական ինստիտուտում Հավերժ Զինվորի անկյուն` նվիրված Արգիշտիին և նաև ինստիտուտի տարածքում հուշաքար է կանգնեցվել ի Հիշատակ Հերոսների:

Փա'ռք քո անմահ հիշատակին` հերոս Եղբայր...
                                                 

Ալվինա Հարությունյան







                    

Ծանուցում․ Կայքից մեջբերումներ անելիս հղումը banak.info-ին պարտադիր է: Կայքի հոդվածների մասնակի կամ ամբողջական հեռուստառադիոընթերցում առանց banak.info-ին հղման արգելվում է:
Տեղեկացրու՛ ընկերներիդ`